BAGUIO CITY – Parikut ita ti Baguio City Jail, Male and Female Dorm ti congestion wenno ti kinakurang ti espasyo para kadagiti balud.
Iti interview ti Bombo Radyo, kinuna ni Jail Superintendent Mary Ann Ollaging-Tresmanio, City Jail Warden iti Male Dorm, 437 a balud ti adda iti dua pulo ket walo a selda.
Dinakamatna a walo pulo ket dua a babai ti nakabalod met iti Baguio City Female Dorm nga addaan laeng ti lima a selda.
Sigun met kenni Jail Inspector Dalver Pulupul, City Jail Warden iti Female Dorm, 412% congested ti pasilidad dagitoy.
Impetteng met dagiti opisyal nga agtultuloy ti koordinasyon ti BJMP kadagiti dadduma nga ahensya ti gobyerno kas ti Public Attorneys Office, Commission on Human Rights, Parole and Probation Office tapno masolusyonan ti nasao a problema.
Kabayatanna, adda met ti indonar ti Baguio City Government a lote sadiay Asin Road nga addaan ti kalawa nga 3,000 sqm a pakaibangonan ti maysa a pasdek para iti kanayonan a selda dagiti balud.
