BAGUIO CITY – Inaklon ti City Health Services Office (CHSO) ti kinakurang ti transport vehicle a pakailuganan kadagiti pasyente ti COVID-19 iti siudad ti Baguio.
Sigun kenni City Health Officer Dr. Rowena Galpo, pagparparikutanda iti agdama ti nasao a pakaseknan gaputa awan ti umdas a lugan a mangitulod kadagiti indibdiual nga agpospositibo iti COVID-19 manipod iti pagtaenganda agingga iti isolation facility.
Manipod iti datos ti CHSO, uppat laeng manipod iti 20 a distrito ti siudad ti addaan iti bukodda a patient transport vehicle kas ti Gibraltar, Pacdal, Trancoville ken Burnham-Legarda.
Imbutaktak metlaeng ti opisyal a dumandanon iti 30 agingga 40 ti backlog dagitoy a kasapulan a maiturong iti isolation centers wenno kadagiti pagagasan.
Impettengna a saan a maakomodar amin ti maysa wenno dua a transport vehicle dagiti pasyente nangnangruna ita nga umad-adu ti kaso ti COVID-19 iti siudad.
Kinunana nga adda ti 10 pay a baranggay nga agbolboluntaryo para iti transportasyon ngem saanda pay nga ammo nu kayat dagioty nga agilugan kadagiti pasiente manipud iti dadduma a barangyay.
Gapu iti daytoy, ad-adalen ti lokal a gobierno nga agala iti kanayunan a driver tapno maaramat dagiti dadduma a lugan ti gobierno.
Kitkitaenda metlaeng ti posibilidad a maaramat dagiti school bus ken ibaklay ti lokal a gobierno ti bayad kadagitoy.
