Manarimaan ti pannakikoordinar ti lokal a gobierno ti Baguio iti Department of Human Settlements and Urban Development (DHSUD) tapno maamuan ti kinalehitimo ti konstruksyon ken operasion ti Dragon Treasure Castle, kasaruno dagiti reklamo a nagtaud manipod kadagiti residente iti Irisville Subdivision idiay Barangay Irisan.
Sigun kenni Baguio City Mayor Benjamin Magalong, imbilinnan iti City Planning Office tapno pormal a makikoordinar iti Department of Human Settlements and Urban Development (DHSUD) tapno maberipikar nu nagtulnog ti nasao nga atraksion iti urban development regulations ken nakaal iti amin a kaskenan a permit.
Impaganetget ni Magalong a kasapulan ti naun-uneg a pannakaadal kadagiti dokumento ti establisimiento.
Sigun gamin kadagiti residente, masinga ti inaldaw a panagbiagda gapu iti traffic congestion a mapaspasaran iti uneg ti subdivision ken inyumanda pay daytoy nu naipasidong iti public consultation sakbay ti pannakaibangon daytoy. Kinuwestunarda pay ti posible nga epekto daytoy iti aglawlaw ken kadagiti tao nu saan a dagos a marisut.
Nailukat ti Dragon Treasure Castle kas maysa a theme park iti uneg ti subdivision idi Enero 2025. Naduktalan iti rekord ti siudad a ti temporario a permit to operate ket nagleppas idi March 31, 2025.
Numan pay nagaplikar ti establisimiento iti regular business permit, agtaltalinaed a ti aplikasyon ket adda iti evaluation gaputa manarimaan ti panagadal dagiti lokal nga otoridad nu nagtulnog iti agdama a pagalagadan.
