Mabigbigbeg agingga iti agdama ti kinapateg ti akem dagiti town criers sadiay Otucan Sur Bauko,Mountain Province.
Dagiti town criers wenno maaw-awagan a manbegaw ti agserserbi a wagas tapno maipakaammo wenno maiwaragawag dagiti nagduduma nga aktibidad ken pakaseknan iti maysa a lugar.
Sigun kenni Wilbert B. Wadingan, kagawad iti nadakamat a lugar, nupay mabalinen a maipakaammo dagiti nagduduma a pakaseknan babaen iti panagaramat ti social media, agtaltalinaed ladta a napateg ti kaadda dagiti town criers gapu ta saan nga amin a masakupan ti nasao a lugar kas kadagiti sumagmamano a sitio ket addaan ti signal tapno makaakses ti internet.
Mainaig iti dayta, imbinglay met ti maysa kadagiti residente ti Otucan Sur a saan laeng a napateg dagiti town criers para iti panakaipakaammo dagiti damdamag kadagiti umili nu di ket, maysa metlaeng daytoy a wagas tapno mapreserba ti kultura ken tradisyon.
Iti baet nga agraraira ti baro a teknolohiya, impasigurado dagiti opisyales iti nasao lugar a saan a mapukaw ti nasao nga aramid ken mapagtalinaed daytoy kadagiti sumarsaruno pay nga henerasyon.//Jhazerrelle Mae Bitaya-LBNC Bauko Mt. Province