BAGUIO CITY – Nakasagana latta ti Department of Education (DepEd) – Benguet a mangirugi iti school year 2020-2021 iti baet ti panakaiyakar inton Oktobre 5 ti panaglukat ti klase kadagiti parapubliko a pagadalan.
Daytoy ket kalpasan a nagkaykaysa nga impeksa dagiti mayor dagiti 13 a munisipyo ti probinsia, ti DepEd-Benguet ken dagiti maseknan nga ahensia ti commitment dagitoy iti panakailukat ti klase.
Sigun kenni DepEd-Benguet Schools Division Superintendent Benilda Daytaca, ti kinasagana iti probinsia iti panaglukat ti klase ket naibasar iti dandani malpasen a panakaimprenta dagiti self-learning modules para kadagiti estudyante, panagsanay dagiti mannursuro ken ti panaka-orient dagiti nagannak, guardians, lokal a gobyerno ken dagiti stakeholders.
Maibasar iti datus ti ahensia, 80% ti kababaan a porsiento iti kinasagana dagiti munisipyo iti Benguet a mangipatungpal ti klase bayat a ti kangatuan ket 95%.
Inkarina pay ti panagadaptar ti DepEd–Benguet iti baro a wagas ti panagadal iti sidong ti new normal.
