[photo credit to the owner]
BAGUIO CITY – Palpalagipan manen dagiti otoridad ti publiko iti panagbalin dagitoy a nakasagana ken alerto kontra iti aniaman a kalamidad kagiddan ti panakalagip ti 1990 killer earthquake ditoy Baguio City inton bigat, July 16.
Sigun kenni Mayor Mauricio Domogan, no nakasagana ti publiko kontra iti aniaman a didigra ken no agtungpal dagitoy kadagiti pagalagadan ti gobyerno kas iti umno a panangipasdek iti balay wenno establishimiento ket maliklikan ti panakadadael dagiti sanikua wenno ti panakapukaw ti biag.
Linagip ti mayor ti magnitude 7.7 a gingined idi July 16, 1990 a nakaro a nangdadael iti City of Pines ken nangitunda iti ipupusay ti nasurok 1,600 a tattao iti nagduduma a lugar iti Northern Luzon.
Kabayatanna, nangipatungpal iti earthquake drill ti sumagmamano a barangay iti Summer Capital of the Philippines kas paset ti pananglagipda iti 1990 killer quake.
Sigun kenni East Bayan Park Punong Barangay Tomas Tolete, panggep ti nasao nga earthquake drill nga isuro ken palagipan manen ti publiko seknan kadagiti banag a nasken nga aramiden dagitoy tunggal adda ti kalamidad.
Naamuan a sumagmamano a grupo ken residente ti mangipatungpal iti bukodda nga aktibidad inton bigat, saan a tapnu lagipen ti makapaldaang a pasamek, ngem ketdi, tapnu pagyamanan ti Namarsua gaputa nabaelan ti City of Pines a bimmangon manipud iti nasaem a napalabas. – Glory Balegan/Annette Tanglib/Alfred Pudsoc
