BAGUIO CITY – Silulukat ti opisina ti Traffic Enforcement Unit (TEU) ti Baguio City Police Office (BCPO) a mang-awat ken mangimbestigar iti aniaman a reklamo kontra kadagiti traffic enforcers wenno traffic aids.
Inyunay-unay daytoy ni P/Major Roldan Cabatan, dadaulo ti nasao nga yunit ti pulisya iti panakiuman ti Bombo Radyo Baguio kas reaksionna iti maysa a post iti social media mainaig iti maatap a panagkiddaw ti nag-tiket iti P500 kasukat ti P1,500 a bayadan daytoy iti City Treasury.
Kinunana nga uray imbestigaranda ti nasao a naipablaak iti social media ket saan met a mabalin a daytoy ti basaran tapnu makasuan ti nagbiddut a traffic enforcer.
Sigun kenkuana, nakasaganada a mangtulong kadagiti agipila ti formal complaint iti BCPO-TEU kontra kadagiti pulis, traffic enforcers ken traffic aides nga aglablabsing iti linteg.
Impettengna a kasapulanda ti kooperasyon ti publiko iti panakaimplementar ti Intensified Cleanliness Policy ti pulisya, partikular ti panakadalus ti organisasyon manipud iti korapsion.
Innayon ni Major Cabatan a nainget ti panangtungpalda iti karida nga agserbi iti publiko iti amin a kabaelan dagitoy ken makikaykaysada iti panakapatalinaed ti integridad ken reputasyon ti PNP Baguio ken ti Cordillera Police kas maysa kadagiti ‘most disciplined police’ iti entero a pagilian babaen iti panangipatungpalda iti linteg iti patas ken nainkalintegan a wagas.
Impettengna pay a nasken a saan nga agbalin a paset ti corrupt system ti publiko babaen iti panangidiayada iti pasuksuk kadagiti traffic enforcers, pulis wenno traffic aides gapu laeng ta saanda a kayat a mataktak iti biahe dagitoy.
Inyunay-unayna pay a nasken nga agtungpal no matiliw dagiti traffic enforcers ken traffic aides gaputa dagitoy ti naipaayan ti otoridad a mangipatungpal kadagiti linteg trapiko ken kadagiti ordinansa ti siudad ti Baguio.
