BAGUIO CITY – Impasigurado ti Department of Public Works and Highways (DPWH) – Cordillera ti kinasaganda nga agresponde kasaruno ti panakaideklara ti panawen ti tudo.
Sigun kenni DPWH-Cordillera regional director Tiburcio Canlas, uray saanda nga ammo ti agbalin nga epekto dagiti masungad a bagyo a dumalapos iti rehiyon ket nakasagan ti ahensia kasaruno ti napasaran nga epekto dagiti napalabas a bagyo nga Ompong ken Rosita idi napalabas a tawen.
Kinunana a gapu iti napasaran ti rehiyon ket ammodan ti worst case scenario a mabalin a mapasamak iti rehiyon.
Innayonna nga ita ket na-mobilize ti maximum resources, equipment ken dagiti personnel ti DPWH-Cordillera.
Imbingayna a sakbay pay ti opisyal a panakaideklara ti panagtutudo ket addan dagiti napasaran a panagregaay ti daga iti nagduduma a paset ti rehiyon.
Dinakamat ni director Canlas a nagkiddawda ti kanayonan a pondo manipud iti gobyerno para iti panakagatang dagiti kagawaan ken iti panakapondo dagiti proyekto kas iti rock netting gapu iti kaadu dagiti landslide incidents a mapaspasaran ti rehiyon tunggal panagtutudo.
Iti agdama ket naka-blue alert latta ti entero a Cordillera Region gapu iti epekto ti habagat a pappapigsaen dagiti low pressure areas.
