BAGUIO CITY–Nagpositibo iti covid-19 ti 61 a balud ken uppat a jail guards ti Benguet Provincial Jail a masarakan sadiay La Trinidad, Benguet kalpasan a naipasidong dagitoy iti COVID-19 testing idi February 26.
Iti interview ti Bombo Radyo Baguio kenni La Trinidad Mayor Romeo Salda, inlawlawagna a naipasidong dagiti nasao nga indibidual iti COVID-19 testing kalpasan a nagpositibo ti maysa a kameng ti provincial jail idi February 23 ti agdama a tawen.
Innayonna a naipasidong ti nasao nga ahensiya iti lockdown bayat a naka-quarantine ken maob-obseran dagiti nasao nga indibidual para iti posible a panakaiyakar dagitoy iti Benguet General Hospital.
Iti agdama, nakailistan ti La Trinidad iti nasurok 1,600 a pakabuklan a kaso ti COVID-19 a bukbuklen ti nasurok 1,400 a naimbagan, 176 nga agpapaimbag ken 33 nga ipupusay.
Kabayatana, impanamnama ti Benguet Provincial Jail iti kinatalged dagiti balud a nakaptan iti COVID19.
Iti interview ti Bombo Radyo Baguio ken Benguet Provincial Jail Warden Jail Supt., Peter Tip-ac, kinunana a nakaisolate ita dagiti amin a Person Deprived with Liberty (PDL) iti nasao a pagbaludan.
Innayunna a dumanon iti 73 a balod ti nagpositibo manipod iti 97 a bilang dagiti balod sadiay.
Malaksid iti dayta, inmunan a nagpositibo ti uppat a jail guards sadiay kasaruno iti naipatungpal a COVID-19 testing kadakuada idi February 26.
Impanamnama ni Tip ac iti pannakaipasigurado ti kinatalged ken umno a pannakataripato kadagiti balod agingga mataming dagitoy iti COVID19.
