Baguio City – Pinunas dagiti organizers ti Panagbenga ti panagdanag dagiti turista nga agturong ditoy siudad para iti panakarambak ti pestibidad gapu iti napasamak nga engkuwentro sadiay Camp 4, Tuba, Benguet idi napalabas nga aldaw.
Iti baet daytoy, iningetan latta dagiti organizers ti seguridad para iti umadani a Grand Street Dance ken Grand Float Parade.
Segun kenni Baguio Flower Festival Foundation Incorparated (BFFFI) Media Committee Co-chair Andrew Pinero, nakikoordinardan iti Baguio City Police Office (BCPO) para iti nainget a seguridad iti umadani a panakarambak dagiti highlights ti Panagbenga.
Impanamnamana nga awan ti nasken a pagdanagan dagiti turista gaputa agtaltalinaed a naka-heightened alert ti BCPO ken ti Armed Forces of the Philippines.
Kabayatanna, kinunana a nasken a saan a dagus a mamati ti publiko kadagiti agwarwaras a damag nangruna no saan pay a nakumpirmar.
