BAGUIO CITY – Agtultuloy ti panakaiyimplimentar dagiti pagannurotan nga inpaiyulog ti Department of Education a makatulong tapno marisut dagiti pakaseknan ti estudyante ken dagiti mannursuro kagiddan ti mapaspasaran a napudot a panawen.
Iti interview ti Bombo Radyo kenni Jennifer Ande, manipod iti Curriculum and Learning Management Division – Department of Education-Cordillera, ipangpangruna dagiti maipapaiyulog a pagannurotan a risuten ti pakaseknan iti kinatalged ken salun-at dagiti estudyante, kasta met dagiti daduma pay a wagas para iti agtultuloy a panakaipaay ti edukasyon kagiddan dagiti saan a nasayaat a tiempo.
Sigun kenni Ande, addan ti naipaiyulog a pagannurotan para iti panaka-administer ti klase kadagiti pagadalan manipod alas sais ti agsapa agingga alas dies ti agsapa para iti morning shift ken alas dos ti malem agingga alas sais ti sardam para met iti afternoon shift tapno saan unay a mapasaran dagiti estudyante ti epekto ti napudot a tiempo bayat ti panag-atendar dagitoy iti klaseda.
Malaksid iti dayta, karaman metlaeng kadagiti mitigating measures ti nasao nga ahensya ti panagaramat ti alternative delivery mode kas iti self learning modules ken hybrid mode of learning.
Innayon ni Ande a temporaryo a mapalubusan dagiti estudyante a saan nga agaramat ti uniform laketdi agtulnog dagitoy iti dresscode ken disente dagiti ikawesda.
Kagiddan dayta, nadutukan dagiti regional office ti nasao nga ahensya a mangiruar ti guidelines tapno agpapada ti panakaiyimplimintar dagiti shifting iti klase kadagiti masakupan dagitoy a pagadalan.
Kabayatanna, dagiti pagadalan nga adda kadagiti lowlands iti Division of Abra ken Division of Apayao ti madaman nga agar-aramat kadagiti alternative delivery mode iti rehion Cordillera gapu paylaeng iti napudot a tiempo.
Agtaltalinaed met a normal ti panaka-administer dagiti klase iti Baguio City, probinsya ti Benguet, ken daduma pay a saan unay a makapaspasar iti nakaro a napudot a paniempo.//Bombo Rob Dominguez
