Nagparang ni Kingdom of Jesus Christ (KOJC) leader Pastor Apollo Quiboloy ita nga aldaw kas “detainee” bayat ti press conference sadiay Camp Crame idiay Quezon City.
Sigun iti Philippine National Police (PNP) idi kalman, ni Quiboloy ket simmuko kalpasan a naipaayan daytoy ti “ultimatum” nga agparang iti uneg ti baente kuatro oras.
Kinuna ni Police Colonel Jean Fajardo, pannakangiwat ti Philippine National Police nga impaay dagiti kameng ti pulisia ti “ultimatum” kenni Quiboloy a sumuko iti uneg ti baente kuatro oras, ta no saan, sumrek dagiti otoridad ti maysa a pasdek iti KOJC compound sadiay Davao City.
Nangrugi ti negosasion iti agarup 1:30 p.m. idi kalman.
Kalpasan ti sumagmamano nga oras, nagparang ni Quiboloy iti Intelligence Service of the Armed Forces of the Philippines (ISAFP) iti agarup 5:30 p.m.
Iti agdama, kadua ni Quiboloy da Jackielyn Roy, Ingrid Canada, Crisente Canada, ken Syliva Cemañes.
Kabayatanna, sigun met kenni KOJC legal counsel Atty. Israelito Torreon, nagdesision ni Quiboloy a sumuko kadagiti kameng ti pulisia ken militar tapno maisardeng ti “lawless violence” wenno kinaranggas iti uneg ti compound ti simbaan a KOJC.
Naipay metten ti warrant of arrest kenni Quiboloy ken dadduma pay gapu iti panaglabsingda iti Special Protection of Children Against Abuse, Exploitation, and Discrimination Act, kasta metten ti human trafficking.
Ni Quiboloy ket naidarum metlaeng babaen ti federal grand jury iti US District Court for the Central District of California gapu iti kaso a conspiracy to engage in sex trafficking by force, fraud and coercion and sex trafficking of children; sex trafficking by force, fraud and coercion; conspiracy; ken bulk cash smuggling.
Nupay kasta, maulit-ulit a pinaglibakan ti kampo ni Quiboloy dagiti alegasion kontra kenkuana.
