Binabalaw ni Senate President Francis “Chiz” Escudero dagiti saan a nasayaat a panagsasao ni Vice President Sara Duterte kenni President Ferdinand Marcos Jr.
Sigun kenni Escudero, saan a maitutop dagiti saan nasayaat a sasao ni Duterte kas maikadua a kangatuan nga opisial iti pagilian.
Innayon ni Escudero a saan nga umno ti agusar iti dakes a balikas bayat ti livestream ti press conference a mabalin a buyaen dagiti menor de edad.
Maipalagip a kinuna ni Vice President Duterte bayat ti press conference ti “Drag Me To Hell,” gapu iti mapapati a panagatake kenkuana bayat nga imimbestigaran ti Kamara ti panaggastona kadagiti confidential funds iti opisinana ken iti Department of Education.
Malaksid iti dayta, inawagan pay ni Duterte ni President Marcos Jr. nga “incompetent leader” a kayatna a putden ti ulona ken kayatna a kalien ti bangkay ti ama daytoy a ni sigud a President Ferdinand Marcos Sr. tapno ibellengna iti West Philippine Sea.
Mangnamnama ni Escudero nga iti sumaruno a press conference ti Bise Presidente ket ad-adda nga agannad daytoy kadagiti balikasna iti baet a karbengan ti tunggal maysa nga iyebkas ti pungtot ken saan a rason datoy tapno agibalikas kadagiti saan a nasayaat a pagsasao.
Iti sabali a bangir, namnamaen ti Senate President nga agtunos da Marcos Jr. ken Duterte tapno saan a ti saanda a panagkinnaawatan ti mangidaulo iti panangituray iti pagilian a Pilipinas.
