Imbinglay ni National Maritime Council (NMC) Spokesperson Usec. Alexander Lopez a paset laeng ti propaganda ti China ti panagpost dagitoy iti social media a kukuada ti Batanes.
Kinuna ni Lopez nga awan ti nakaidumaan ti statement ti Beijing iti immun-una nga statement ti China a paset ti pagilianda ti Palawan.
Impaganetget ti nasao nga opisial a misinformation, disinformation ken kinaulbod amin dagitoy.
Innayon ni Lopez a saan a mabalin a mapasamak daytoy gaputa saklawen daytoy ti teritorio ti Pilipinas, ken kinunana nga awanen a pagilian ti mamati iti China.
Malaksid iti dayta, nalawag iti arbitral ruling a kukua ti Pilipinas ti West Philippine Sea.
Patien ni Lopez a ti propaganda ti China a kukuada ti Batanes ket kayatda laeng ti maaddaan iti baro a salaysay ken ikagkagumaanda a baliwan ti kinapudno tapno mariro ti publiko.
