BAGUIO CITY – Suspendido ti serrek dagiti estudyante iti intero a probinsya ti Benguet inton bigat tapnu makapaset ti amin a miembro ti academe iti panakarambak ti Teacher’s Day.
Maisayangkat inton bigat, iti alas sais ti agsapa, ti maysa a motorcade ken parada manipud iti City Limit, Km. 3 agingga iti Capitol Grounds ken pasetan daytoy ti manursuro pakairamanan dagiti retirees, ken aminen a panakabagi dagiti nagduduma nga ahensia ken opisina ti gobyerno.
Immunan a naideklara ti maudi a biyernes ti Setyembre kas Teacher’s Day iti probinsya ti Benguet kalpasan a naaprubaran ti “Teachers Day Ordinance” idi March 16, 2015.
Segun kenni Board Member Atty. Johnny Waguis, chair ti Teachers’ Day Committee, panggep ti Benguet Teachers Day ti aktibo a panakipaset dagiti manursuro iti selebrasyon.
Kinunana a ditoy pay a maipatungpal dagiti aktibidad tapnu maiparikna kadagiti manursuro ti kinapateg ti akemda iti panagisuroda kadagiti estudyante tapnu agbalinda a responsable nga umili iti probinsya.
Panggep pay daytoy a maipaayan iti pammabigbig dagiti kwalipikado a manursuro gapu iti kabayagda iti serbisyo, exemplary achievements ken outstanding performance dagitoy.
