BAGUIO CITY – Kinarit ti winner ti Kahapon Lamang Program Light at the End of the Tunnel ti Bombo Radyo Baguio dagiti agtutubo a saanda a sumuko agingga a maragpatda dagiti arapaapda iti biag.
Segun kenni Carl Jeffry Cabatu, 24-anyos, tubo ti Caloocan City ken agdama nga agsursuro iti kolehiyo ditoy siudad ti Baguio, saan nga ipapaay ti Namarsua dagiti parikot nu saan tayo a kabaelan.
Kinunana a kas iti dadduma ket adu ti binukelna nga arapaap ngem gapu iti kinarigat iti biag ken iti saan a panagturpos iti panagadal ti manangna ket saan a kinayat ti amana nga agadal daytoy iti kolehiyo.
Nupay kasta, inkagumaanna a nagturong ditoy siudad ti Baguio, nagbalin nga iskolar kalpasan a nagbalin a miembro ti choir member iti maysa nga unibersidad ken simrek iti nagduduma a trabaho tapnu adda ti magastosna iti panagadal daytoy.
Kinunana nga adda daytoy iti maikatlo a tukad ti kolehiyo idi kinayatna ti sumuko nangruna idi nagsakit ti ina daytoy iti myoma wenno tumor iti ovary ngem ginuyugoy daytoy ti inana ken propesorna nga ituloyna ti agadal.
Iti panagan-anusna ket nagturpos daytoy iti kurso a Bachelor of Secondary Education iti las-ud ti lima a tawen ken nagmartsa a kadwana ti inana idi Marso 2014.
Iti agdama ket tumultulong daytoy iti pamilyana ken iti panangpaadal iti buridek a kabsatna.
