Naarestar ti maysa nga agtawen iti 26 a lalaki kalpasan a nagtakaw iti uneg ti maysa a supermarket idiay Luneta Hill, Baguio City.
Iti impormasyon a naala iti Bombo Radyo Baguio manipod Baguio City Police Office-Police Station 7, agronronda ti maysa a security guard iti uneg ti supermarket idi nadlawna ti suspek a sigun kenkuana ket “known shoplifter.”
Gapu iti dayta, limed a sinurut ti security guard ti nasao a shoplifter agingga a nakadanon daytoy iti aisle 27 nu sadino, dita metten a naimatanganna a nangala ti suspek kadagiti chocolates ken inkargana iti usarna nga slingbag.
Kasaruno dayta, nangala pay ti shoplifter iti daduma nga items kas iti shampoo, sabon, condiments ken daduma pay.
Kalpasan a naala daytoy dagiti banag a kayatna nga alaen, nagturong iti counter nu sadino, tallo laeng nga items ti binayadanna.
Idi arigna ket normal laeng a rimwar daytoy manipod iti nasao a shopping establishment, kinomprontar daytoy ti security guard.
Idi kiniddaw ti security guard ti resibo dagiti amin a linaon ti bag ti shoplifter, awan ti naipakitana rason a kinuyog ti gwardiya daytoy paturong iti customer relation service.
Kagiddan dayta, nagkiddaw metlaeng dagitoy iti police assistance rason a nakemmeg ti suspek.//Bombo Noveh Organo
