BAGUIO CITY–Nangbukel ti Economic Development Sectoral Committee ti Regional Development Council – Cordillera iti sumagmamano a komite a mang-adal ken mangkita kadagiti tulong a maipaay kadagiti pamilya nga inapektaran ti napalabas a Bagyo nga Ompong.
Sigun kenni Department of Trade and Industry (DTI) – Cordillera regional director Myrna Pablo, sungbatda daytoy nga addang iti direktiba ni Presidente Rodrigo Duterte a napartak a panakaipaay ti tulong kadagiti maseknan a pamilya.
Kinunana a nagtaripnong ti komite nga idadauluanna ken inadalda no kasano a maipaay dagiti regional line agencies ti napartak a tulong kadagiti apektado a pamilya gapu iti napalabas a bagyo.
Innayonna a kangrunaan a tutukanda ti panakaipaay ti trabaho, panakaipaay ti scholarships para iti panagilako kadagiti produkto ken panagsanay para iti livelihood.
Sigun pay kenni Pablo, iparang dagiti maseknan a komite ti action plan dagitoy iti taripnongda inton October 11.
Kabayatanna, maangay sadiay Itogon ti jobs fair ken Diskwento Caravan inton October 24.
