BAGUIO CITY – Makidkiddaw ti panangikonsidera dagiti otoridad iti nagduduma a rason dagiti jeepney drivers ken operators seknan iti ordinansa a mangimanmandato nga agpasada da agingga alas dies ti rabii.
Iti interview ti Bombo Radyo kenni Wilson Bumay-et, Presidente ti Jeepney Federation – Baguio & Benguet, inaklonna nga adu dagiti terminal a nasapa a maw-awanan kadagiti agpasada gapu ta awanan metlaeng dagitoy ti pasaheros nangruna kadagiti asideg laeng iti Central Business District.
Sigun kenni Bumay-et, case-to-case basis kuma ti aramiden dagiti maseknan nga opisyales ti siudad iti panangipatungpal iti nasao nga ordinansa gapu ta adda met dagiti terminal nga agop-operate uray pay agingga alas dose ti rabii kas kadagiti agturong idiay Irisan.
Malaksid iti dayta, masapol pay a maikonsidera ti panakabannog dagiti drivers a mangrugrugi nga agpasada iti alas kuatro ti agsapa.
Mainaig iti dayta, dinakamat ti opsiyal nga adda metlaeng dagiti terminal a mangdutdutok kadagiti drivers nga agsisinnublat nga ag-overtime.
Kabayatanna, posible nga adu kadagiti drivers ti saan nga agaplikar nga agpasada iti las-od ti walo nga oras laeng kagiddan ti maisaksakad a modernization program gapu ta posible a basbassit ti agbalin a pamastrekan dagitoy.//Bombo Rob Dominguez
