BAGUIO CITY – Maipatakder iti lima a barangay ti Baguio City ti lima a satellite markets ita a tawen.
Sigun kenni Arch. Johnny Degay, assistant chief ti City Buildings and Architecture Office, umuna a maibangon inton sumaruno a bulan ti four-storey satellite market nga addaan ti basement parking iti Gibraltar District.
Kinunana a sumarunon to a maibangon ti kapada nga istruktura sadiay San Vicente, Middle Quezon Hill, Dominican-Mirador ken Bayan Park.
Dinakamatna a tunggal satelite market ket nailatangan iti P3-M a pondo manipud iti 2020 Priority Infrastructure Projects ti siudad.
Kinunana a makatulong dagiti satellite markets kadagiti residente ti siudad nangruna ta limitado ti garaw dagitoy gapu iti epekto ti community quarantine.
Innayonna a maksayan metlaeng ti kaadu dagiti tattao nga agturturong iti Baguio City Public Market ken maipaayan iti pagtaudan iti panggedan dagiti umili a makatulong iti panagdur-as ti ekonomiya ti siudad.
