Kidkiddawen ti Barangay Irisan ti napartak a pannakalepas ti mannarimaan a konstruksyon ti kanal idiay Naguilian Road, Barangay Irisan, Baguio City.
Iti eksklusibo a pannakiuman ti Bombo Radyo Newsteam kenni Arthur Carlos, Barangay Chairman ti Barangay Irisan, makikokoordinarda iti mangitartarimaan iti nasao a kanal tapno mailepasen daytoy ken saanen a maulit pay ti panaglayos iti nasao a kalsada.
Maipalagip a nalayos ti kalsada idi Hulyo 10 ti agsapa gapu iti tuloy-tuloy a panagbayakabak iti napigsa a tudo no sadino pinnulatan ti nagduduma a basura kas iti konstruksyon materials ken dadduma pay ti kanal.
Kabayatanna, sigun kenni Mayor Benjamin Magalong, manamnama nga agleppas ti construction ti nasao a kanal inton umay a bulan ti Agosto.
Impeksa ti mayor a bayat iti panangispectda iti nasao a pasdek, nakitada a constricted ti nasao a kanal wenno drainage system.
Nupay kasta, kinunana a mapalpalawa daytoy.
Kabayatanna, impeksa ni Barangay Chairman Arthur Carlos nga agtultuloy latta ti panagmonitorda iti masakupanda kalpasan a nairekord ti dua a kaso ti soil erosion iti masakupanda.
Maysa kadagiti kaso ti soil erosion ket gapu iti construction no sadino adda ti nadadael a property.
Iti kaudian a damag, nagsarita metten dagiti dua a partido no sadino bayadan ti contractor ti pannakatarimaan ti nadadael a property. //via Bombo Noveh Organo
