BAGUIO CITY – Agtultuloy ti panagrikos ni Mayor Victorio Palangdan ken dagiti opisyal dagiti nagduduma nga ahensia kadagiti barangay sadiay Itogon, Benguet tapnu paka-ammuan dagiti umili ti munisipyo seknan iti kasasaad ti panagminas sadiay ken dagiti tulong manipud iti gobyerno.
Sigun kenkuana, kangrunaan a napagnunumuan ti lokal ken nasyonal a gobyerno, pakairamanan dagiti maseknan nga ahensia ti panakaipaay ti immediate help ken dagiti long-term solution nga ipaplanoda para kadagiti apektado nga umili ti munisipyo.
Dinakamatna ditoy ti Emergency Employment Program ti DOLE ken ditoy a maipasidong iti survey dagiti umili tapnu maamuan no asino dagiti interesado a makipurdiya tapnu adda ti mangsustinir iti pagkasapulan ti pamilyada.
Nnnayonna nga adda met ti ipaay ti DENR a trabaho nangruna dagiti kayatna ti agmula iti kayo iti sidong ti National Greening Program bayat nga agrikos ti TESDA tapnu amuenda kadagiti umili no anya ti kayat dagitoy a livelihood program tapnu isu ti pakaipasidonganda iti panagsanay.
Dinakamat ti mayor a nagsaritan ti Municipal Council a mangilatangda iti pondo a maipaay a kapital dagiti kayatna ti livelihood project.
Sigun pay kenni Palangdan, karaman iti long-term solution a makitkitada ket mapagbalin nga agricultural area ti Itogon ken dawatenna kenni Presidente Duterte a no mabalin ket maideklara a public land dagiti abandonado a mining area iti munisipyo tapnu maaramat iti agroforest tourism a permanente a pagtrabahuan dagiti minero a mapukawan ti pagtrabahuan.
