Inlawlawag iti kontraktor iti matartarimaan a kalsada idiay Road 2, Interior B, Balacbac, Santo Tomas Proper, Baguio City a nailaylayon ti konstruksyon iti nasao a kalsada agingga June 15.
Iti panakiuman ti Bombo Radyo Baguio iti kontraktor, imbinglayna nga adu dagiti parikut a napasaran dagitoy rason a nailaylayon ti konstruskyon manipod iti puntiryada a panakaileppas daytoy idi May 21.
Karaman kadagiti dinakamatna a parikut ti panagtudtudo nu sadino, kasapulanda a nga isardeng ti operasyon para iti kinatalged dagiti trabahador.
Nupay kasta, impanamnama daytoy nga ileppasda ti konstruksyon iti naituding a panakaileppasna wenno ti extended target date.
Ti pammalawag ket kasaruno ti apela dagiti residente a mafast-track wenno mapapartak ti panakaileppas ti nasao a konstruksyon.
Mainaig iti dayta, inlawlawag metlaeng ti nasao a kontraktor nga agsasabali a trabahador ti nadutukan tunggal trabaho kas iti panagpalitada, panagcurb ken gutter, panangisimpa iti riprap, canal, ken dadduma pay rason a maob-obserbaran ti dua agingga tallo nga indibidwal nga agtrabtrabaho.
Nagpalawag daytoy kalpasan metlaeng ti pammabalaw dagiti residente seknan iti bilang dagiti agtrabtrabaho a patienda a makaap-apektar iti nabayag a panakaileppas iti konstruksyon.
Gapu iti dayta, makidkiddaw ti kooperasyon ken pannakaawat dagiti residente para iti pannakaileppas ti nasao a kalsada.
