Agtultuloy paylaeng a maad-adal ti plano a rehabilitation ti Baguio City Public Market gapu ta ado dagiti isyu a kasapulanda a talantanen.
Iti pannakiuman ti Bombo Radyo Baguio kenni Baguio City Councilor Atty. Edison Bilog, kinunana nga adda ti nakitada a problema iti kontrata gapu ta mas pabor ti project proposal iti proponent nu idilig iti benepisyo a maawat ti merkado publiko.
Sigun iti nasao a konsehal, umannugot daytoy a saanen a kasapulan a ti pribado a kompanya ti mangidaulo iti proyekto gapu ta mamati daytoy a kabaelan ti lokal a gobyerno a mangpasayaat iti merkado publiko.
Inlawlawagna a nakitada iti kontrata a bassit laeng ti bayadan ti project proponent a renta nu sadino arigna a naited laeng ti Baguio City Public Market iti pribado a kompanya.
Gapu iti daytoy, impakaammo ni Councilor Bilog nga adda ti maangay nga special session inton Disyembre 11 ken Disyembre 12 a dar-ayan ti project proponent para iti naan-anay a panakaadal dagiti nakalanad iti kontrata.
Inaklon ni Councilor Edison Bilog a maysa kadagiti isyu a nasken a masolusyonan iti uneg ti Baguio City Public Market ket ti subleasing.
Sigun kenkuana, nasken a maipatungpal ti strict implementation dagiti city ordinances tapno masolusyonan ti nasao nga isyu.
Karaman ditoy ti pannaka-administer dagiti ordinansa ken linteg iti siudad tapno dagiti naglabsing ket maikkaten iti merkado publiko. | via Bombo Karen Sapirao
