BAGUIO CITY – kinumpirmar ti lokal a konseho ti Baguio ti contract of service iti nagbaetan ti lokal a gobyerno ti siudad ken ti Metro Clark Waste Management Corporation (MCWMC) a masarakan sadiay Capas, Tarlac para iti panakaibelleng dagiti basura ti Baguio sadiay.
Nailanad iti Resolution No. 275, series of 2021 a pinirmaan ni Mayor Benjamin Magalong nga agpaut ti nasao a kontrata iti las-ud ti 30 nga aldaw manipud idi Marso 8 ti agdama a tawen ken automatic a mailaylayon daytoy iti kanayonan a 30 nga aldaw agingga a kedngan ti dua a partido a waswasen ti kontrata.
Maipalagip nga imparikep ti DENR ti engineered sanitary landfill sadiay Urdaneta City, Pangasinan a sigud a pangibelbellengan ti siudad iti basura gapu kadagiti sumagmamano a panaglabsing ti pasilidad.
Gapu iti daytoy, napilitan ti siudad a nagbiruk ti alternatibo a pagbasuraan agingga nga impaayan ti konseho iti bileg ni Mayor Magalong a makipinnirma ti kontrata iti Metro Clark Waste Management Corporation para iti panagbelleng ti Baguio iti pasilidad daytoy.
Nailanad iti kontrata nga agbayad ti siudad iti tipping fee a P650 tunggal tonelada.
