BAGUIO CITY – Dinayaw ti dadaulo ti Philippine Embassy in Egypt ti napintas a kontribusyon ti Filipino Community sadiay iti laban kontra iti COVID-19 sadiay Ethiopia.
Iti ekslusibo nga interview ti Bombo Radyo Baguio kenni Ambassador Sulpicio Confiado, imbingayna a nagaramid dagiti nagduduma a grupo dagiti OFWs sadiay Ethiopia iti handwashers, disinfectant tent, washable facemasks ken dadduma pay a kagawaan a manglapped iti panagraira ti COVID-19.
Dinakamatna nga agtultuloy ti panangmonitorda kadagiti OFWs ken Pinoy immigrants kadagiti pagilian a masakupan ti embahada, partikular sadiay Egypt, Eritrea, Ethiopia, Djibouti ken Sudan ken adda ti network dagitoy para iti dagus a panakaipaay ti tulong kadagiti agkasapulan ken iti panakaidanun dagiti kaskenan nga impormasyon.
Kinunana a kanayon ti panangpalagipda kadagitoy nangruna iti panagsurotda kadagiti paglintegan nga inyulog ti World Health Organization tapnu makaliklik dagitoy iti COVID-19.
Impannakkelna a natalged ti kasasaad dagiti OFWs kadagiti nasao a pagilian.
Dinakamat pay ni Ambassador Confiado nga addan dagiti OFWs a nagkiddaw para iti repatriation isut gapuna a manarimaan metten ti koordinasyon ti embahada kadagiti maskenan nga ahensya ditoy Pilipinas.
Naamuan nga adda ti maysa nga OFW sadiay Egypt a nakaptan ti COVID ngem manamnama ti iruruar daytoy iti kabiitan a panawen bayat a dagiti Pinoy nurses sadiay Egypt, Ethiopia ken Sudan ket agtaltalinaed a natalged.
