BAGUIO CITY – Binabalaw dagiti umili ti Baguio ti pakaiparang ti portrait ti dua nga aso a nakabadu ti native attire dagiti Igorot a nakadisplay iti kadakelan a mall ditoy siudad.
Sigun kenni NCIP Commissioner Atty. Rommel Wandag, maibilang nga ‘insensitive’ iti biang dagiti Igorot ti nasao a portrait gaputa mangipapaay ti negatibo nga imahe kadagiti Igorot.
Kinunana a saan a rumbeng a naiparang ti nasao a portrait gaputa mangtikaw daytoy kadagiti dadduma nga indibidual.
Sigun kenkuana, rumbeng a maipangruna ti panaka-ikonsidera iti ‘culture sensitivity’ tapno maipanamnama a saan a masair ken malabsing ti karbengan dagiti Cordillerans.
Innayonna nga ad-adalenda ita no rumbeng a maipilaan iti kaso dagiti mangiladladawan ken mangipabpablaak kadagiti banag a maisupadi iti galad, langa ken kababalin dagiti Igorot.
Inaklon pay ni Atty. Wandag a dagiti nasao a banag ket art wenno ‘sining’ ngem kasapulan a maipampangruna ti kultura ti maysa a tribo.
