BAGUIO CITY – Kidkiddawen ti lokal a gobyerno ti Baguio ti kooperasyon dagiti umili iti siudad partikular ti panagtungpalda iti schedule ti panagbayad ti buis sadiay City Hall.
Iti panakiyuman ti Bombo Radyo, guyguyuguyen ni City Administrator Engr. Bonifacio Dela Peña dagiti residente iti panangitugot dagitoy kadagiti kaskenan a requirements sakbayda nga agturong sadiay City Hall.
Sigun kenkuana, babaen iti daytoy ket naparpartak ti panakaiproseso dagiti kasapulanda a permit.
Inyapelana met ti saan a panaggigiddan dagiti umili nga agturong iti agsapa sadiay City Hall gaputa mangituntunda daytoy iti atiddog a pila.
Innayonna nga ad-adalen ita ti opisinana ken ti City Treasurer ti panakabukel ti sattelite releasing areas tapnu marisot ti parikot seknan ti nasao a pila.
