BAGUIO CITY – Impasigurado ti Public Order and Safety Division – Baguio a tumulongda iti daduma pay a maseknan nga opisina iti panakaiwanawan ti kailuklukat a living street idiay Carantes-Perfecto, Baguio City.
Kasaruno daytoy ti makitkita dagiti maseknan nga opisina nga agbalin a parikut ti saan a nasayaat a panakaibelleng ti basura sadiay.
Sigun kenni Darryl Kim Longid, mangidadaulo iti Public Order and Safety Division – Baguio, gapu iti mabalin a paginanaan ken bleachers a naikabil ket posible met nga ibati dagiti agturong sadiay dagiti basura dagitoy.
Gapu iti dayta, kinunana a tumulong dagitoy tapno mabagbagaan dagiti matiliwan a mangibati ti basura da iti nasao nga street.
Innayona pay a nainget a bambantayanda dagiti agmomma iti Living Street.
Malaksid pay iti dayta, masapul metlaeng a mabantayan dagiti naikabil a mula iti nasao a lugar.
Nu sadino, kinuna ni Longid a panggepda a mangikabil kadagiti signages a mangipawpawil iti panagparot/panag-ala ti sabong wenno aniaman a mula sadiay.
Kiddawna pay ti kooperasyon ti publiko para iti panangpatalinaed iti kinapintas ken kinadalus ti kaunaan a Living Street iti siudad.//Bombo Jez Lapizar
