Impetteng ni Lucia Dalteo ti Imelda Marcos Barangay Captain a babaen iti koordinasyon ken panagtitinulong dagitoy pakairaman dagiti umili iti masakupanna a barangay ti rason a nagun-odda ti pammadayaw.
Daytoy ket kalpasan a naawatda ti 1st Runner-Up Barangay iti administration and implementation of the Disaster Risk Reduction and Management programs iti siudad ti Baguio bayat ti Search for the Best Performing Barangays idi napalabas a tawen.
Naipaay ti nasao a pammadayaw iti Newtown Hotel Events Center, Baguio City idi laeng kanikadua.
Iti pannakiuman ti Bombo Radyo kenkuana, kinunana a saan dagitoy a ninamnama ti nasao a pammadayaw ngem pagyamanna ta maysa met ti barangay dagitoy a napadayawan.
Malaksid iti dayta, pinagyamanna met dagiti kakadua daytoy nga opisyal kasta metten dagiti umili gapu iti agtultuloy latta a pannakipartisiparda kadagiti programa dagitoy iti nasao a barangay.
