BAGUIO CITY – Nakemmeg ti maysa a Koreano kalpasan a nagtakaw wenno nag-shoplift ti nagduduma a groceries iti uneg ti kadakkelan a mall sadiay Luneta Hill, Baguio City idi kalman.
Nabigbig daytoy a ni Tae Gu Kwon, 53-anyos, awanan asawa, tubo ti South Korea ken agnanaed sadiay Bakakeng Norte, Baguio City.
Maibasar iti report, nakita ti gwardiya ti panangikabil ti suspek kadagiti nagduduma a groserya iti maysa a yellow plastic bag bayat nga adda daytoy iti Foods and Services Center ti nasao a supermarket.
Nagturong ti suspek iti Lane 15 ngem ti laeng binayadanna iti cashier isut gapuna a sinurot daytoy ti gwardiya ken inturongda iti kwerpo ti pulisya ti nasao a suspek idi awan ti naiparang daytoy a resibo dagiti dadduma a produkto nga inalana.
Naamuan nga aggatad iti nasurok P2,100 ti pakabuklan a gatad dagiti produkto nga inala ti nasao a Koreano.
