BAGUIO CITY – Nairikep ti Municipal Trial Court ti La Trinidad, Benguet kalpasan a nagpositibo ti maysa nga empleyado sadiay.
Agpaut agingga inton Wednesday, December 30 ti panagrikep ti nasao a korte para iti panakaisayangkat ti contact tracing, testing, quarantine ken disinfection.
Nailanad iti memorandum ni Executive Judge Marietta Brawner-Cualing nga inaprobaran ti Court Administrator babaen kenni Deputy Court Administrator Raul Villanueva ti panakairikep ti Municipal Trial Court ken ti Hall of Justice sadiay La Trinidad, Benguet.
Nupay kasta, agawat latta ti korte iti pleadings ken motions a maipila babaen iti online kas maitunos iti pagalagadan nga impaylog ti Supreme Court.
Masurot met ti work-from-home arrangement ken videoconferencing para kadagiti kaso.
Maibasar iti kaudian a datus ti La Trinidad, Benguet idi December 20, dumanonen iti 207 ti pakabuklan a kaso ti COVID-19 sadiay.
