BAGUIO CITY – Agtaltalinaed a parikot ti Baguio City Police Office (BCPO) ti kinakurang ti bilang dagiti kameng dagitoy a mangimando iti nailet a taray ti trapiko iti nagduduma a paset ti siudad.
Kinuna ni BCPO Acting Director Police Sr.Supt Ramil Sacules a dumanun laeng iti 650 ti personnel dagitoy.
Sigun kenkuana, manmano laeng dagiti na-deputized a pulis a mangiwanawan iti trapiko nangruna kadagiti kangrunaan a kalsada a makapaspasar iti nailet a taray ti trapiko.
Kinunana nga iti tunggal aldaw ket saan a bumaba iti 40 a reklamo a maaw-awat ti BCPO manipud kadagiti makapaspasar iti nailet gunay ti trapiko.
Gapu iti daytoy, kiniddaw ni Saculles iti lokal a gobierno ti pannakaadal ti panangala dagitoy iti kanayunan a police auxilliary a maiwaras kadagiti hot spots areas iti siudad.
Tarigagay met laeng ti BCPO a mapasayaat dagiti traffic control devices iti siudad kas iti staging area, kanayunan nga intersection ken dadduma pay a makatulong a mangkissay iti nailet a trapiko.
