BAGUIO CITY – Manayonan pay dagiti kurso a maipalubos a maidiaya iti limitado a face-to-face class iti academic year 2021-2022 iti rehion Cordillera.
Kasaruno daytoy ti panakaipalubos ti nasao a sistema ti panagadal kadagiti 12 a pagadalan para kadagiti health-related degree programs dagitoy.
Sigun kenni Commission on Higher Education (CHED)-Cordillera Regional Director Demetrio Anduyan Jr., ur-urayenda laengen ti joint memorandum ti DOH, DepEd ken ti CHED seknan iti panakaipalubos ti limited face-to-face class kadagiti kurso nga engineering, information technology, business-related programs ken industrial technology.
Kinunana a kasapulan dagiti nasao a kurso ti ‘hands on’ activities.
Innayonna a manamnama metlaeng a manayunan ti bilang dagiti pagadalan a mangisumitir ti ‘letter of intention’ para iti panakaipatungpal ti limited face-to-face class.
Dinakamatna a nabalakadan metten dagiti pagadalan a mangididiaya kadagiti nasao a kurso iti panagsagana dagitoy para iti inspeksion apaman a mapaipaulog ti maur-uray a joint memorandum.