Innaklon ni Bangko Sentral ng Pilipinas Governor Eli Remolona Jr. , dadaulo met laeng ti Anti-Money Laundering Council nga agtaltalinaed a karit iti nasao a council ti panang-track kadagiti kuwarta a tinakaw ti gobyerno gapu ta dadduma kadagitoy saan a naideposit kadagiti bangko.
Inlawlawagna a kabaelan ti Anti-Money Laundering Council a mangmonitor kadagiti bank accounts e-wallet accounts, insurance policies, ken daduma nga assets a konektado iti flood control scam iti pagilian a Pilipinas.
Nupay kasta, marigatan dagitoy a mang-track kadagiti assets ken kwarta a saan a naideposit kadagiti bangko.
Innayonna a mannarimaan ita iti panagkiddawda iti tulong kadagiti dadduma nga ahensiya tapno tumulong a mang-track kadagiti kwarta iti ruwar ti formal banking sector.
Iti baet amin dagitoy, imbinglay ni Remolona a papigsaenda pay ti Anti-Money Laundering Council tapno makatulong iti pannakatrack kadagiti kwarta ken iti money laundering schemes iti pagilian a Pilipinas. // Bombo Karen Calpoe Sapirao
