BAGUIO CITY- Nagballaag ti Philippine Atmospheric, Geophysical and Astronomical Services Administration-Baguio (PAGASA-Baguio) a posible a mapasaran ti La Niña iti pagilian kadagiti sumarsaruno a bulan.
Iti pannakiuman ti Bombo Radyo kenni Mar Santos, Weather Observer ti PAGASA-Baguio, kinunana a 70% ti tsansa a mapasaran ti La Niña iti pagilian intun Oktubre agingga Pebrero iti sumaruno a tawen.
Iti kanito a mapasaran daytoy, posible nga agsasaruno ti bagyo a dumalapos iti pagilian.
Gapu iti dayta, palpalagipan ni Santos ti publiko nga agannad ken agsagana iti posible nga agsasaruno a bagyo.
Kabayatanna, posible a dumanon iti uppat a bagyo ti mapasaran ita a bulan ti Sitiembre.
Mabambantayan metlaeng ti dua a Low pressure area, partikular sadiay Palawan ken Sursugon.
Nupay kasta, inyunay-unay ni Santos a bassit ti tsansa daytoy nga agbalin a bagyo.
Iti agdama, Easterlies ti mangap-apektar iti rehion Cordillera ken sumagmamano a paset ti pagilian.//mp4
