BAGUIO CITY – Naituding a maipasidong iti re-swabbing dagiti dua nga indibidual a nagpositibo iti UK Variant sadiay La Trinidad, Benguet idi Marso 23 iti agdama a tawen.
Sigun ken Mayor Romeo Salda, naideklara idi Marso 28 a nakarebor dagiti nasao a pasyente kalpasan a nagleppas ti sangapulo ket uppat nga aldaw a panakaipasidongda iti isolation.
Nupay kasta, masapul a maipasidongda manen iti RT PCR test tapnu maipasigurado a siento porsiento a napukkaw ti virus iti bagi dagitoy.
Inlawlawagna a naladaw nga impakaammo ti Department of Health ti resulta ti specimen dagitoy a nagpositiboda iti UK variant agsipud ta naipatulod pay ti samples dagitoy sadiay Philippine Genome Center.
Dinakamatna a residente dagitoy iti barangay Poblacion ken Cruz, La Trinidad ken naamoan nga awanan dagitoy iti travel history.
Gapu iti daytoy, patien ni Salda a posible a naalada ti nasao a virus iti pagtrabahoanda.
Imbinglayna nga iti agdama ket maisaysayangkat ti contact tracing kadagiti nakapulopal dagitoy nupay nabayagen daytoy.
