LA TRINIDAD, BENGUET- Posible a maipasidong ti munisipyo ti La Trinidad, Benguet iti “state of calamity” gapu iti agtultuloy a panagngato ti kaso ti dengue sadiay.
Sigun kenni La Trinidad Mayor Romeo Salda, dumanon iti 1,431 (725 male; 706 female) a kaso ti nailista dagitoy iti nasao a munisipsyo manipud Enero agingga ita a bulan.
Malaksid iti dayta, nakailista dagitoyen iti kumpirmado nga uppat a fatalities gapu paylaeng iti nasao sakit.
Nakailista ti Barangay Pico iti kaaduan a kaso nga addaan iti 257; Balili a 250; Tawang nga 165; Puguis nga 152; Poblacion nga addaan iti 126; Betag nga 86; Lubas 76 ken sag-50 kadagiti dudduma a barangay.
Impetteng met ni Mayor Salda, a nangisayangkat dagitoy iti fogging operations ket dadduma a wagas tapno madadael dagiti posible a pagitlogan dagiti lamok.
Iti agdama, maur-uray paylaeng ti advisory manipud kadagiti health experts no kasapulan a maideklara ti nasao a munisipyo iti state of calamity.
