Manamnama nga ipakaammo ti Department of Agriculture iti mabiit dagiti binukelda a pagalagadan para iti panakaikkat dagiti labels dagiti imported a bagas tapno maliklikan ti price manipulation iti nadakamat a commodity.
Kasaruno dayta ti naobserbaran a panakaaramat dagiti label a premium ken special tapno allilawen dagiti konsyumer.
Sigun kenni Department of Agriculture Secretary Francisco Tiu-Laurel Jr.,igag-gagara dagiti sumagmamano a retailers ken traders nga aramaten dagiti nadakamat a label tapno mainkalinteganda ti panangipangato dagitoy iti presyo dagiti lakoda nga imported a bagas.
Nupay kasta, inlawlawag ti opisyal nga agepektibo laeng ti binukelda a pagalagadan kadagiti imported a bagas ken saan a karaman dagiti locally produced tapno maprotektaran metlaeng ti karbengan dagiti mannalon ken traders a Pilipino.
Iti sabali a bangir, saan met a kinanunungan ni Bantay Bigas spokesperson Cathy Estavillo ti nadakamat a plano gapu ta mabalin metlaeng daytoy nga agbalin a rason iti ad-adda a saan a panakaammo dagiti konsyumer kadagiti kalidad dagiti bagas a gatangenda.
