BAGUIO CITY- Nakemmeg ti maysa a lalaki sadiay La Trinidad, Benguet kalpasan a nagtakaw ti agarup P278-K a cash ken cellphone nga aggatad ti P8,000 itay nabiit.
Nabigbig ti suspek a ni Jeronimo Garcia, laborer, residente ti Pico, La Trinidad ken tubo ti Pinukpuk Kalinga bayat a ti biktima ket maysa a negosyante, residente ti Western Buyagan ken tubo ti Buguias, Benguet.
Maibasar iti imbestigasyon, nagparada ti biktima kadwana ti asawana iti sango ti maysa nga establishemento sadiay Buyagan, La Trinidad.
Rimwar dagitoy tapno apanda alaen ken ikarga dagiti orderda a produkto.
Nupay kasta, idi apanna alaen ti sling bagna nga imbatina iti helpers seat tapno agbayad ket ditoy a naduktalanna a mapukpukaw pakairamanan ti cellphonena.
Dagus met a sinukimatda ti CCTV a nakamuntar iti establishemento ken ditoy a nakitada ti maysa a lalaki a nang-ala iti nasao a bag a naglaon ti agarup P278-K a cash, cellphone ken wallet.
Gapu iti daytoy, sumango ni Garcia ti kaso a panaglabsing iti Article 308 ti Revised Penal Code wenno theft.
