BAGUIO CITY – Pimmusay ti maysa a laborer bayat a nadangran ti tallo a kakadwana kalpasan a nagaburan dagitoy iti nargaay a daga sadiay Anteg-in, Loacan, Itogon, Benguet idi kanikadua.
Nabigbig ti pimmusay a ni Eugene Balao, 24-anyos bayat a nabigbig dagiti nadangran a da Alexander Morca, 52-anyos; Vincent Pal-a, 30-anyos ken Lordan Mayawen, 20-anyos.
Maibasar iti imbestigasyon ti pulisya, agkalkali dagiti biktima iti igid ti kalsada ken kabayatan ti panang-abotda kadagiti batbato ken daga ket killaat a nareggaay a nagresulta iti panakatama dagitoy.
Dagus a naiturong iti pagagasan da Morca, Pal-a ken Mayawen para iti panakatamingda kalpasan a nagsagrapda ti dunor iti nagduduma a paset ti bagida.
Nupay kasta, saanen a nakalasat ni Balao a nagaburan kadagiti dadakkel a bato gapu iti nasagrapna a dunor iti ulo ken dadduma a paset ti bagina.
Nagdesisyon dagiti responding members ti Itogon Municipal Health Office a saanen a maiturong iti pagagasan ti bangkay ni Balao ken iti pammalubos ti pamilyana ket naiturong daytoy iti maysa a punerarya para iti panakaiprosesona sakbay a naiyawid iti pagtaenganda sadiay Bokod, Benguet.
