BAGUIO CITY – Pimmusay ti maysa a laborer kalpasan a nalmes bayat ti panaglangoyda iti karayan sadiay Batad, Banaue, Ifugao idi kalman.
Nabigbig daytoy a ni Joseph Benmaso Binat-an, 22-anyos, baro, tubo ti Mankayan, Benguet ken agnanaed ita sadiay Bocos, Banaue, Ifugao
Naduktalan iti imbestigasyon dagiti pulis a nagturong ni Binat-an ken dagiti kakadwana sadiay Tappiya, Batad, Banaue tapnu ag-picnic.
Naglangoy dagitoy iti karayan sadiay ngem gapu iti pimmigsa nga ayos ti danum ket aksidente a nalmes ti baro.
Narekober ti bagi ni Binat-an kalpasan ti retrieval operation nga insayangkat dagiti barangay officials ti Batad, Banaue, Ifugao ken dagiti kabagian dagitoy.
Naiyawid metten ti bangkayna iti pagtaenganda sadiay Banaue, Ifugao para iti lamay daytoy.