BAGUIO CITY – Nabigbig kas ‘best practice’ ti COMELEC-Baguio ken ti Baguio City Police Office iti napalabas nga eleksion iti barangay ken SK ti nasayaat a ‘timing’ iti panagbaklas dagitoy kadagiti campaign posters a naglabsing iti linteg ti eleksion.
Sigun kenni Baguio City Election Officer Atty. John Paul Martin, nangitunda daytoy iti panakabaklas ti nasurok 1,700 a campaign posters iti maudi nga aldaw ti panagkakampanya.
Kinunana a ditoy nga adu ti nabaklas dagitoy ken babaen iti nasao nga addang ket awanen ti gundaway dagiti kandidato a mangisubli iti iligal a poster dagitoy.
Innayonna nga insumitirdan iti Law Department ti COMELEC dagiti ladawan ken imbentaryo dagiti nabaklasda a campaign posters a naglabsing iti linteg ti eleksion, pakairamanan ti uppat nga election complaint a naawat dagitoy.
Dinakamat pay ni Atty. Martin a ti nasao a departamento ti mangimbestigar ken mangdesisyon kadagiti nasao a pakaseknan.