Nakemmeg ti maysa nga agtartaray a pugante a nakadungpar ti lugan kalpasan a pinatid ti maysa a sibilyan, isut rason a natiliw daytoy dagiti otoridad idiay Kayseri, Turkiye.
Maimatangan iti video a nagwaras iti social media, a nakalugan paylaeng iti kotse ti suspek ken liblibasanna ti maysa nga otoridad a mangpaspasardeng kenkuana.
Ngem bayat ti panaglibasna, nakabangga daytoy ti maysa a kotse, a rason ti dagos a panagruarna iti kotse ken pinartakanna a timmaray.
Nakaaddayon ti suspek idi kellaat daytoy a pinatid ti maysa a lalaki a sibilyan iti dalan daytoy.
Natumba ti suspek ken dagos a nadanonan dagiti otoridad ken natiliw.
Saan a dagos a nalawag kadagiti otoridad nu apay a naglibas ti suspek a rumbeng kuma nga agsardeng laeng iti ordinario nga “stop warning.”
Idi nangipatungpal ti beripikasion seknan iti kinasiasino daytoy, naamuan dagiti otoridad a maysa gayam a “convicted” nga agtatakaw ti suspek a nabigbig a ni E.P.
Maibasar iti rekord dagiti otoridad, nasentensian ti kaso a robbery wenno panagtakaw ti suspek ken nasentensian ti 16 a tawen ken 11 a bulan a pannakaibalud.
Nagsubli iti pagbaludan ti suspek a namultaan metlaeng gapu iti panaglabsingna iti pagaladanan ti trapiko.
Nagyaman dagiti otoridad iti sibilian a naaddaan iti tured a nangpasardeng iti agtataray a suspek.
