Posible a maipasidong iti psychiatric examination ti lalaki a nailadawan a vagrant a nang-agaw iti paltog ti maysa a policewoman idi kalman, March 1 iti Baguio City.
Iti impormasyon a naala ti Bombo Radyo manipod kadagiti kapulisan, napasamak ti insidente agarop alas onse iti agsapa(11:00AM) idi kalman ken naireport daytoy kadakuada alas onse y media (11:30AM) iti metlaeng kapada nga aldaw partikular idiay T.Alonzo, Baguio City agingga Baguio Central University, Lower Magsaysay Avenue.
Ti suspek ket maysa a lalaki nga agtawen iti 29 a residente iti Santiago Isabela bayat a ti policewoman ket agtawen met iti 39 a nadutukan iti RIDD PROCAR.
Iti inisyal nga imbestigasyon ti kapulisan, nakaiggem ti policewoman iti foodpack bayat a bumallasiw koma iti pedestrian lane idiay T.Alonzo, Baguio City idi inasitgan daytoy ti suspek a maatap nga armado partikular ti igam wenno kutsilyo.
Iti dayta metten a gundaway nga inagaw ti suspek ti paltog ti policewoman ken nagtaray patuorng iti Lower Magsaysay.
Maysa metlaeng a pulis ti nakaimatang ti nasao a komosyon rason a kinamatna ti suspek.
Kasaruno dayta, nakemmeg metlaeng ti suspek ngem kinalbitna ti paltog nu sadino, ti metlaeng left hip daytoy ti natamaan.
Gapu iti dayta, naiturong daytoy iti pagagasan ken iti agdama ket nasayaaten ti kasasaadna.
Nalpas metten a naipatungpal ti paraffin test ken iti agdama ket naipaman ti naaramat a paltog iti kustodiya ti maseknan nga istasyon ti pulisya.
Kabayatanna,imbinglay ti maysa nga opisyal iti kapulisan a nakauman ti Bombo Radyo a sakbay ti insidente ket adda pay ti immuna a nakairamanan ti suspek.
Napasamak daytoy idiay Don Bosco idiay Metro Manila nu sadino, adda ti kinamat ti suspek a gwardiya.
Saan a naireport daytoy iti istasyon ti pulisya ngem naalaan metlaeng iti video ken nagviral iti social media.
Kalpasan ti nasao nga insidente, simmang-at ti suspek agingga a nakadanon iti T. Alonzo, Baguio City.//Bombo Noveh Organo
