BAGUIO CITY – Nakemmeg ti maysa a lalaki, dua nga aldaw kalpasan a nag-viral iti social media sadiay Abra ti panagtakawna iti tallo a baboy sadiay Pinpinas, Bucay, Abra idi Sabado, August 29.
Nabigbig daytoy a ni Julius Liberato, 32-anyos ken residente ti Bangbangcag, Bucay, Abra.
Nagpammarang ti suspek a gatangenna dagiti tallo a baboy a tartaraknen ti biktimana.
Kalpasanna ket inluganna dagiti tallo a baboy iti kurung kurong ken intugotna ti biktima paturong iti kustomerna.
Nupay kasta, bayat nga adddada iti biahe ket imbaga ti suspek a nadadael ti kurung kurong isut gapuna a bimmaba ti biktima.
Pinaguray ti suspek ti biktima ken inrasonna a subliyenna daytoy ngem saanen a nagsubsubli pay.
Gapu iti daytoy, nagreklamo iti istasyon ti pulisya ti biktima ken iti imbestigasyon dagiti pulis ket nabirukanda ti suspek.
Naamuan a dagus a nagpakalbo ti suspek kalpasan a naamuanna a nag-viral iti social media ti ladawan dagiti video footages iti panangitarayna kadagiti baboy nga inlakona iti maysa a residente ti Lagangilang, Abra.
Kabayatanna, positibo met nga intudo ti maysa pay a biktima a ni Liberato ti nangitaray metlaeng iti dua a baboyna sadiay Lusuac, Peñarrubia, Abra idi August 24.
Inkalintegan met ti suspek nga agkasapulan daytoy ti kwarta isut gapuna a naaramidna ti nasao a banag, no sadino, dagus nga impatulodna iti pamilyana sadiay Manila ti kwarta a nangilakuanna kadagiti intarayna a baboy.
Inkarina a bayadanna dagiti nasao a baboy.
