Napilaan iti kaso a Physical Injuries ti maysa a lalaki gapu iti panangpangpang-orna iti maysa nga indibidwal aramat ti bareta idiay Anuvang-Letbek, Tinongdan, Itogon, Benguet itay laeng kallabes.
Ti akusado ket maysa a lalaki nga addan ti ligal nga edad ken residente iti Tinongdan, Itogon, Benguet bayat a ti biktima ket maysa nga agtawen iti 47 a residente met iti Ba-ayan, Tublay, Benguet.
Maibasar iti imbestigasyon, manarimaan ti panangimuntar ti biktima ken ti anak daytoy iti shanty wenno paglinungan dagitoy idiay Tinongdan idi dimteng ti akusado kadwa ti saan pay nabigbig nga indibidwal.
Sigun pay iti imbestigayson, addaan iti imet a buneng ti akusado a nakasalikad iti siketna ken makapungpungtot a nagturong iti ayan ti biktima.
Kasaruno dayta, pinidotna ti bareta sakbayna nga impang-pang-or iti biktima.
Gapu iti kinapigsa iti panakapang-or iti biktima ket natuled ken naulaw daytoy ngem nabaelanna pay iti timmaray tapno saanen manayonan pay ti panakadangranna.
Sumagmamano laeng met a minutos ti napalabas ket pimmanaw metlaeng ti akusado iti nakapasamakan iti insidente kadwa ti saan pay nabigbig a kakuyogna.
Ti biktima ket inispal met ti anak ken ti katuganganna ken dagus a naitaray idiay Itogon District Hospital.
Kabayatanna, sigun kadagiti otoridad, immunan a naikonsulta ti nasao a banag iti maseknan a barangay ngem saan daytoy a narisut rason a naipadanonen iti Itogon Municipal Police Station.
Saan pay met a nalawag ti rason iti panangdangran iti akusado iti biktima ken agparparang nga awan daytoy iti impluwensya iti arak idi inaramidna ti krimen.
Iti agdama, agtultuloy latta ti imbestigayson iti nadakamat a kaso.//Bombo Noveh Organo
