BAGUIO CITY–Naiturongen iti punerarya ditoy Baguio City ti bankay ti lalaki a nasarakan a nakadasay iti maysa a kanal iti depaar ti Peday Loacan, Itogon, Benguet-Nueva Vizcaya Road idi kalman.
Sigun iti inisyal nga imbestigasyon ti Itogon Municipal Police Station, nabigbig ti bankay a ni Crosaldo Cachero, 37-anyos ken residente ti Longlong, La Trinidad, Benguet.
Nakitaan iti dunor ken sugat iti nagduduma a paset iti bagi ti nasao a lalaki ken nakitaan pay daytoy iti tama ti bagsol iti kannigid a paset ti abagana.
Maipalagip a nasarakan ti bankay babaen iti maysa nga umili iti nasao a lugar no sadino nadanunan a nakapakleb daytoy iti maysa a kanal iti nasao a kalsada.
Agtayag daytoy iti 5′ 2″, nakasuot iti blue a maong pants, puraw a hooded sweater, ken addaan iti nangisit nga sling bag a naglaon iti medical certificate a nakanagan kenni Crosaldo Cachero, cellphone ken kwarta.
Nakita pay iti bag ti maysa a pakete ti maatap nga illegal a droga.
Suksukimaten met itan dagiti otoridad ti pakabigbigan ken motibo ti/dagiti suspek.
