BAGUIO CITY – Naitabonen ti bangkay ti lalaki a pimmusay iti pagagasan kalpasan a nasarakan nga awanan ti puot iti igid ti kalsada sadiay Badiwan, Tuba, Benguet idi agsapa ti November 29, 2021.
Sigun kenni PMaj. Leonard Danasen, hepe ti Tuba Municipal Police Station, awan ti nangbigbig iti nasao a lalaki isut gapuna a nagdesisyonda nga itabon ti nasao nga indibidual.
Dinamatna a kiniddaw ti maseknan nga ospital ti panakaala ti bangkay manipud iti morgue daytoy kas maitunos iti pagalagadan kontra iti COVID-19.
Iti baet daytoy, kidkiddawenna latta kadagiti mapukpukawan ti pamilya ti panagturongda iti istasyon ti pulisya sadiay Tuba ken agimetda ti ladawan tapno makumpirmar no kabagyanda ti naitabon a lalaki.
Naamwan a killaat a natalimudaw ti saan pay a nabigbig a lalaki isut gapuna a dagus a naitaray iti pagagasan ngem naideklara a pimmusay idi agsapa ti November 30.
Mapapati palaboy ken mentally disturb ti nasao a lalaki ken awan ti nakita nga identity card daytoy wenno aniaman a pakabigbiganna.
Nakasuot ti lalaki iti black t-shirt ken jacket, maong pant, tsinelas ken mapattapatta nga agtawen ti 30-35.
Naitabon daytoy iti Poblacion Public Cemetey sadiay Poblacion, Tuba, Benguet.
