[photo credit to the owner]
BAGUIO CITY – Nadangran it maysa a lalaki kalpasan a natnag iti maysa a riprap sadiay Lower Magsaysay, Baguio City idi kalman.
Intunda daytoy ti panaggandatna a tumaray kalpasan nga inawis dagiti pulis nga agturong iti kuwerpo ti pulisya gapu iti panangriribukna iti maysa a balay paginuman ken ti panangdangranna iti maysa a barangay kagawad a nang-anawa kenkuana.
Nabigbig ti suspek a ni Sonny delos Reyes Daquel, 30-anyos, residente ti Barangay T. Alonzo, Baguio City ken tubo ti Umingan, Pangasinan bayat a ti nagreklamo ket ni Kagawad Jomarca Aplosen Abunan ken dagiti barangay tanod ti Lower Magsaysay.
Maibasar iti report, nakita ti kagawad ken dagiti tanod ti pananglablaban ti suspek a ni Daquel iti guwardya ti maysa a balay paginuman isut gapuna nga inanawada daytoy.
Nupay kasta, binugkawan laeng ti suspek ti kagawad, kinaritna dagiti tanod sakbay a dinanogna ti tengged ti nasao a kagawad.
Dagus met a nagresponde dagiti pulis ken sadiay a kinemmegda ti suspek ngem idi nakadanunda iti police outpost ket inikkatda ti posas ti suspek ngem ginundawayanna nga aglibas kalpasan a dinanogna manen ni Kagawad Abunan.
Kabayatan ti panagtaray ti suspek ket natnag daytoy iti maysa a riprap a nangitunda tapnu madangran ken maiturong iti pagagasan.
Sumangsango ti suspek iti kaso nga Assault to Person in Authority gapu iti panangdangranna kenni Kagawad Abunan.
